يلا نتعرف 👀😇

يا مساء الفن على كل متابعيني . أنا سلمى سامي ، طالبة إعلام بس عندي شغف كبير جِدًّا للفن. أهلي اكتشفوا موهبتي وأنا عندي 5 سنين. اختياري للألوان اللي هشخبط بيها كان متناسق مع بعضها، وكنت بقلد أي حاجة قدامي للشكل الهندسي الصح بتاعها . يعني لو قدامي طبق كنت برسم دائرة كبيرة وواحدة صغيرة وأوصل بينهم فتطلع أبعدها مضبوطة نوعا ما. الأطفال في السن ده كانوا بيشوفوا الحاجات مفلطحة شوية فكون أني بشوف الحاجات بالبعد الثلاثي بتاعها ده خلا مامتي تركز معايا شوية . بدأت توديني لمعاهد رسم كثير وكل مُدرس يقولها إني موهوبة فكانت تصر على أنها توديني أماكن اكتر . ومن كتر إصرارها كنت ببقى الطفلة الوحيدة في وسط طلبة كبار في كورس فنون جميلة، وطبعًا كلهم كانوا بيفتكروني بنت الدكتور وجايبها معاه. ومن هنا، بدأت رحلتي مع الرسم.

دائما بتسأل السؤال كده كتير جِدًّا "هل الرسم موهبة ولا مهارة؟" الجواب هو أكيد "مهارة". لو أنت مش موهوب، ممكن تتعلم الرسم وترسم أحلى من الموهوب عشان دي مهارة والمهارة بتكتسب. كل الفرق أنك هتاخد وقت ومجهود اكتر ، وكل حاجة مع الممارسة بتبقى في حته تانية . واللي بيمارس الرسم أكتر هو اللي بيبقى أحسن. وفي مقولة بحبها جِدًّا للفنان فان غوخ بيوجه فيها كلامه للكل وبيقول : "إذا سمعت صوتا بداخلك يقول إنك لا تستطيع الرسم، فهذا يعني ارسم ! ثم سيصمت ذلك الصوت بداخلك للأبد".

الرسم له أهميات كتيرة جِدًّا ، زي أنه بيزود الخيال والإبداع، بيحسن الحالة المزاجية، بيقوي الذاكرة وبيساعد في التطور الكلي للدماغ،. مش بس كده، الرسم بيخليك تتغلب على الخجل وبيديك ثقة في نفسك .

كتير من الناس بيستخدموا الفن كعلاج. اثبتت في دراسات حديثة أن الرسم والنحت والتلوين أو إي نوع فن تاني ، ليه تأثير كبير على النفسية وبيخلي الناس تعرف تعبر عن نفسها وتطلع الكبت اللي جواها. العلاج بالفن بيساعد الأطفال والبالغين أنهم يتخطوا الاضطرابات النفسية زي: الاكتئاب، الضغط العصبي، اضراباط فرط الحركة ADHD، اضطرابات ما بعد الصدمة، وغيرها كتير من الأمراض. الفنان العالمي بيكاسو قال: "الرسم طريقة أخرى لكتابة المذكرات". وده دليل أن زي ما مش لازم تكون أديب أو شاعر كبير عشان تكتب مذكراتك، فبرضه مش لازم تكون بتعرف ترسم عشان تعبر عن أحاسيسك ومشاعرك وكل اللي جواك بالرسم والتلوين.

البلوج بتاعنا هيكون ممتع ومفيد للمبتدئين وللمحترفين في نوع رسم بخامات معينة وعايزين يجربوا خامات جديدة. بعد متابعتكم للبلوج، هتبقوا عارفين معلومات عن كل الأدوات لكل نوع رسم، وأشهر وأحسن البراندات ، وازاي نستخدمها.

الفحم من الأدوات البسيطة والرخيصة جِدًّا ، وممكن كل الناس تعرف تستعمله ويطلعوا شغل معبر وحلوا آوي حتى لو مش بيعرفوا يرسموا كويس. ألوان الخشب من اكتر الألوان المعروفة والمستخدمة، مش عشان حاجة، هي بس اللي دائما كانت بتطلب مننا كلنا في المدرسة. في منها ۳ أنواع، ألوان خشب مائية، ألوان خشب شمعية، وأخيرًا ألوان خشب متركزة على الزيت. هنتكلم عنهم قدام بالتفصيل. ألوان الباستيل هي الألوان المفضلة إلى قلبي مؤخرًا. الرسم والتظليل بأقلام الرصاص هو أهم نوع واللي لازم يتبدأ بيه عشان تعرف تتمرن على النسب، أو تتغلب على "الآرت بلوك". ده مصطلح مهم آوي وبيحصل لكل الفنانين معناه "عدم القدرة على الإبداع والابتكار".

اللي عندوا أي سؤال أو نفسه يتعلم حاجة معينة يقولي في الكومنتات، ولو عجبكم المحتوى وعايزين تتعلموا اكتر تابعوني على انساجرام https://www.instagram.com/salma_artistaa/

.يلا نكتشف الادوات سوا