الثقة بالنفس والسعي

من رأي ان لازم يكون عندكم حاجتين عشان تنجحوا في اي حاجة بتعملوها.

اولاً: الثقة بالنفس.

حاجة اتعلمتها متأخر، مش بس عرفتها، انا عشتها كتير اوي. بعد كل فترة صعبة اوي، وتفتكر ان خلاص قدامك حيطة سد،دايما ربنا  بيفرجها ويعوضك. انا معنديش صحاب كتير، بس بسبب عدم تشجيع الصحاب اللي عندي ليا، كنت كل ما اعمل حاجة كويسة دايما بحس ان ده مش عاجب حد و مش كفايا.. وكان حوليا ناس لو عطست صحابهم بيشجعوهم، وبيبقوا جانبهم في النجاح والفشل. الموضوع ده كان سبب كبير اوي في إحباطي واني مكملش في الرسم اصلا.

في يوم قررت ان "طوظ " ومش محتاجة دعم حد، وبدأت شوية شوية احاول ارجع ثقتي بنفسي تاني. في يوم فتحت صفحة على الانستجرام ورسمت أحمد حاتم كروكي كده، عشان كنت بسخن أيدي. وماكنتش عجباني بس نزلتها وخلاص. وحصل حاجة متوقعتهاش.. انا هسيبكم تقروا انتوا

طبعا مافيش بعد كده تشجيع😂 احمد حاتم في العادة بيشير لوحد عامله تاج بس اللي عمله معايا معملوش مع حد قبل كده.. على كل  ستوري يكتب رأيه، ياخد سكرين ريكورد للفيديو وينزله على الفيسبوك، تاني يوم لما الستوري اتشالت اخد البوست ونزله عنده، بعدها  يعملي فولو ...؟ احمد حاتم، محمد فراج، عمر شرقي، هنا الزاهد، احمد جمال .. كل دول بقوا عارفني بس من اول يوم نزلت فيه. يعني ربنا لما بيعوض، بيعوض بجد من وسع!💙 لما فكرت، الناس دي مش هتجاملني وهي مش عارفاني، لو ماكنتش عاجباهم كان زي اي حد تاني في مصر بيرسمهم وهما مش بيعبروهم عادي جدا. ومن هنا، رجعتلي ثقتي بنفسي تاني🙈ا

 

 الثقة موجودة ؟ تمام

 

تاني خطوة هي: السعي والمعافرة.

كان في حفلة لاكتر مغني بحبه : حماقي. دي كان في صحاب كتير يقدروا يساعدوني اني اوصل رسمتي لحماقي، بس هما مساعدونيش واتحجوا بحجات تافهة جدا. وفي منهم اللي استقل بالرسمة والرسم اصلا.. فضلت اعافر من اول اليوم وكله بيقفلها في وشي و ولاحد مهتم، بس ميأستش وكنت متأملة ان ربنا هيساعدني لانه عارف انا تعبت فيها قد ايه ..ولما قررت اني اعدي بين 100 ألف شخص في الحفلة، وطبعا مافيش حد من صحابي رضا يجي معايا.. ربنا بعتلي حد من صحابي وفضل واقف اكتر من 3 ساعات معايا عشان اعرف اوصله الصورة. شايفين الضحكة اللي على وشه ؟ دي ناستني كل الاحباط اللي كنت حاسه بيه من اول اليوم.. لو كنت سمعت كلام اللي حوليا كنت هبقا خسرت كتير اوي قدام نفسي. وعايزة اقولكم ان في كمية ناس شجعتني بعدها مش طبيعية.. بس بعدها  ومنهم اللي كانوا مستهيفين الموضوع..  

  

اوعوا تخلوا الناس تحبطكم ولا يهزوا ثقتكم بنفسكم. ولو في حد توكسيك حوليك، مهما كنت بتحبوا قد ايه ابعد عنه! عشان هتلاقي ان يوم ورا التاني هتكره نفسك بسببه.  واسعى واتعب لغاية ما توصل للي نفسك فيه منغير متستنى اي حاجة ن حد..